Gaano Kamahal ni Marcos si Imelda?

Last Friday night, nagyaya si Kuya na pumunta sa KKK Café sa Maginhawa. Magpeperform daw kasi ang Words Anonymous at may open mic. Pagdating namin sa café, sobrang dami ng tao. At dahil wala din naman kami maintindihan sa mga performances, naglakad-lakad na lang kami sa Maginhawa at kumain at nagkape somewhere else. Pero bumalik din kami dahil andun pa yung mga officemates ni Kuya. Pagbalik namin, nabawasan na ang mga tao. Nakapwesto na at nakapakinig. Karamihan ay pag-ibig ang topic, kadalasan bitter ang tone. Pero sa lahat ng napakinggan ko that night, yung Minamahal Kong Imelda, written and performed by RJ Carbonell, ang pinaka nagustuhan ko. Tungkol pa rin sa pag-ibig pero kaya ko ito nagustuhan dahil sa political commentary. Sa tulang ito malalaman niyo kung gaano kamahal ni Marcos si Imelda. Handa syang gawin ang lahat, masunod lamang ang mga nais ng kanyang sinta. Hindi ko alam kung gaano katotoo ang mga binanggit sa tula pero naririnig ko na rin dati ang karamihan sa mga nabanggit na pagkakataon.

Here is a copy of RJ Carbonell’s piece. Pero mas maganda pa rin talaga siya pag marinig niyong binibigkas niya.

Minamahal Kong Imelda
by RJ Carbonell

Nagtipon ang daan-daang libong Pilipino sa Epifanio
Upang ako’y patumbahin
Kinikilala akong malaking klepto
Nasa Forbes ako bilang isa sa pinakakurakot na pinuno
Nasa historya ako bilang walang-pakisamang repressive
Pinatahimik ko ang Channel 2 ng isa’t-kalahating dekada
Kinamumuhian ako ng Mga Nagkakaisang Bansa
Sa paggulpi at pagkuryente, ako daw ay vindictive
Pero may isang kasalanan pa kung saan ako’y naakusahan
Mel, inibig kita ng nakamamatay na labis
Literal na nakamamatay
Literal na libu-libong katao lang naman.

Nung una kitang nakilala, niyaya kitang magpakasal
Nagtaka ka kung pa’no yun naging posible
Sinabi ko na simula pagkabata, meron na kong pinangarap na babae
Parati ko itong inuukit sa papel na makapal
May mga dumaang babae, at sa guhit, ‘di sila tumugma
At nung dumating ka, perpekto kang umakma
Kaya Rosas ng Tacloban, nung natanaw kita sa Kongreso nung 1953
Hindi yun pag-ibig sa unang pagkikita
Dahil inibig na kita buong buhay ko
At dahil malapit na ring mag-eleksyon nun.

Alam mo, aking aserong paru-paro
Para kang yung dineklara kong Batas Militar ng 1972
Pinapatahimik mo ang naguguluhan kong puso
Parang Bataan Nuclear Power Plant ang pag-ibig kong wagas
Delikado, pero tama lang na ipagpatuloy
Parang 12am curfew ang maalindog mong katawan
Napapauwi ako ng maaga kapag gabi
Para kang Desaparecidos!
Sa pagkadesperado sayo, naglaho ang aking espiritu’t pagkataong makasarili!
Para kang pagpatay ng walang paglilitis!
Nadamay ang pagkainosente ko sa panay mong pagsaksak sakin.

OA na masyado yung pick-up ko.
Ayos lang, ganun ka rin naman manghingi ng pera’t luho.

Lahat para sayo aking binigay.
Talo mo pa si Queen Elizabeth II.
Nangangati ang paa mo, inday?
Eto, gintong sapatos
Tinanggihan ka ng pinakasikat na banda sa buong mundo?
Kuyugin natin yang mga yan sa airport ng magkagalos.
Naiinsecure ka na ‘di ka napapansin ng media?
Unang pahina bukas, “Imelda, nanguna sa pinakamagandang babae survey.”
May nang-away sayong kumareng asawa ng may-ari ng kumpanya?
Wala ng lupa yan bukas.

Lahat para sayo, aking ginawa
Kasi alam kong lumaki ka sa garahe
Habang ika’y naiinggit sa mga kinakapatid mong maririwasa
Lumikha ako ng bogus na kahariang konseho
Nagtirik ako ng isang palsipikadong bundok
Kung saan ikaw ang madayang reyna ng estado
Niyari ko para sayo lahat ng kadiyablohang despotismo
Habang ang sarap-sarap ng buhay mo
Pagod na pagod na ko sayong koleksyon ng credit card na swapang at walang modo
Pero syempre ‘di ikaw yung tinutukoy ko.

O aking rosas, mukha kang ginto.
Bukambibig, bukang-isip mo, ginto, ginto, ginto
Kumikinang na ginto.
May nadiskubre lang minahan sa Baguio
Umalingawgngaw sa tenga mo, “Ching ching ginto”.
‘Di pwedeng gamitin yung figurative na termino.
Dahil isa kang literal na gold-digger.

Isa kang diplomatikong social climber
Buwisit na buwisit yung estadong sangay ng Amerika
Isa ka daw puslit na gatecrasher
‘Di ka naman inimbita sa pakain ni Carter sa White House
Bigla ka na lang sumipot.
Nakakasuya sa rehimeng powerhouse
Napagkamalan ka ni Ginang Carter na kung sino lang isang beses
Na tinanong niya sa asawa ang nakakahiyang usisang
“Why’s the Asian woman not cleaning up the mess?”

Naalala mo yung Manila Film Center na iyong pinagawa
Pinayagan ko yun.
Sapagkat magiliw ka sa sining
Kaya lang minadali mo yung sistema
Yung deadline, ang strikto
Natibag yung scaffolding
Nahulog yung 169 katao sa semento
Dun na sila nalibing kamo.
Sinugo ko yung manta ng security
‘Di muna ko nagpapasok ng mga magsasagip
Kinabukasan, ‘di nabalita sa radyo, dyaryo, o telebisyon.
Balita: “Imelda, bumili ng bagong painting na realist.”

Nakapirmi lang ng isang dekada ang imperyo
Kaya lang biglang napatay yung dilaw na nakamalaking salamin
Ikaw ba may pakulo?
Maniwala ka, gusto ko na rin siyang ligpitin
Pero napakabobong galaw
Nakatutok ang buong mundo, satin
Nung tumulo na sa rampa yung dugo sa kanyang bungo
Tinakwil na tayo ng mga bansa
Ang mga kapitalista, lumayo
Naubusan tayo ng pondo
‘Di ka na pwede magsun-bathing sa Jamaica
Kung saan ikaw lang tao sa dagat ng isang linggo

‘Di kita sinisisi, sinta.
Pwede kasing si Fabian, si Cojuangco, o ikaw.
‘Di ko sinabing tanga ka
Wag ka umalis
Dito ka lang.
Wag mo ko iwan, sa nipis.
Alam kong mas lalo kong nangangayat, pumangit
Dahil sa transplant
Upo ka lang dito sa tabi ng kama, lapit
Baka ‘di ko na kayanin bukas
Nananakit na baga ko

Ganto, Mely
May kapit pa ko sa Kanong senador
Kuha tayo ng pantulong na salapi
Alam mo, may liposuction daw na tinatawag
Pang-alis taba
Mahal, pero makakaya natin ‘pag nakaluwag
‘Di ka na maaasar na taba ng mga Cojuangco.
Basta dito ka lang
Wag ka aalis dito.

Wag kang mag-alala
Magiging reyna ka ulit
Kaya lang matagal-tagal
Malakas pa si Junior sa masa
Tinangkilik siyang gobernador
At mabilis makalimot ang tao
Kongreso muna siya
Ta’s senador
Ta’s ‘pag kampante na, bise-presidente ng administrasyon
‘Pag sinuwerte, presidente
Wag ka lang sanang malagay sa Department of Finance

Kasi kung marating niya muli ang pinakamataas na posisyon sa ating lupa
May isa akong pakiusap, Mel.
“Puta ng diktador, maawa ka.
Wag ka ng makisawsaw sa kanyang pamamahala”.

Advertisements

One thought on “Gaano Kamahal ni Marcos si Imelda?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s